Барлық фармацевтикалық санаттар арасында ең жоғары өсу қарқыны парацетамол (30%-дан астам) мен антибиотиктерде (21,6%-ға дейін) байқалған. Қазақстан Республикасы Стратегиялық жоспарлау және реформалар агенттігі Ұлттық статистика бюросының мәліметтері бойынша, 2023 жылдың аяғынан 2024 жылдың басына дейін азитромицин мен «Flemoxin Solutab» бағасы күрт көтерілген, деп хабарлайды aqshamnews.kz.
Азитромицин бағасы қаңтар айында бірден 17,9%-ға қымбаттаған. Ақпан айында пенициллиндік препарат санатындағы «Flemoxin Solutab» бағасы 21,2%-ға шарықтапты. Тіпті, соңғы сегіз айда бұл дәрі-дәрмек бағасының қымбаттау қарқыны байқалған. Жаздың соңына қарай азитромицин бағасы біршама тұрақталғандай болды. Дегенмен, препарат құнының өсу динамикасы қазірдің өзінде 13,6% құраған.
Жалпы, Қазақстандағы дәрілік заттардың бөлшек сауда нарығы ағымдағы жылдың бірінші жартыжылдығында көлемдік мәнде 8,1%-ға және ақшалай түрде 21,6%-ға өскен. 2023 жылдың қаңтар-маусым айларымен салыстырғанда өсу қарқыны жоғары болады. Proxima Research International аналитикалық компаниясының деректеріне сүйенсек, қазақстандықтар дәріханалардан жалпы сомасы 326,5 миллиард теңгеге сауда жасап, 253 миллион пакет түрлі дәрі-дәрмек сатып алған.
Компания мамандары 2024 жылы ақшалай түрде фармацевтикалық нарықтың дамуы «ең алдымен физикалық тұтынудың өсуімен анықталатынын» атап өтті. 2023 жылы нарық негізінен инфляция есебінен өсті. Сарапшылардың пікірінше, бөлшек сауда осы жылдың екінші жартысында бәсеңдейді, тіпті төмендеуі мүмкін.