Қазақстан Ұлттық Банкі азаматтарды жеке деректері мен банктік шоттарын жымқырып алу мақсатында алаяқтардың жаңа схемаларды қолдана бастағаны жөнінде ескертеді, деп хабарлайды aqshamnews.kz
Жаңа алаяқтық әдістері:
-
Гүл шоғының жеткізілуі:
Азаматтарға жөнелтушінің деректері көрсетілмеген гүл шоқтары жіберіледі. Кейін қаскөйлер хабарласып, өздерін жеткізуші қызметтің қызметкерлері ретінде таныстырады. Олар хабарламада көрсетілген код арқылы гүл шоғының жеткізілгенін растауды сұрайды. -
Пошта жөнелтілімдері:
Алаяқтар "пошта бөлімшесінен тапсырысты алу" деген сылтаумен зиянды сілтемелер мен хабарламалар жібереді. Мұндай сілтемелерде жеке деректерді енгізу талап етіледі. Соның нәтижесінде алаяқтар телефондағы деректерге, соның ішінде банк қосымшаларына қол жеткізеді. -
Зиян келтіруі мүмкін файлдар:
Мессенджерлер арқылы фотосурет түріндегі зиян келтіру бағдарламаларын жібереді. Фотосуретті ашқан кезде ".APK" кеңейтілімі бар орнату файлы іске қосылып, құрылғыны басқару алаяқтардың қолына өтеді. -
Жасанды интеллект арқылы алдау:
Алаяқтар жасанды интеллект технологияларын қолданып, жақын адамдардың дауысын немесе бейнесін имитациялайды. Олар туыс немесе таныс ретінде хабарласып, ақша аударуды, сілтемеге өтуді немесе жеке деректерді айтуды сұрайды.
Ұлттық Банктің кеңестері:
- Үшінші тұлғаларға құпия ақпарат бермеңіз.
- Күдікті қоңыраулар мен сұратулардың түпнұсқалығын тексеріңіз.
- Бейтаныс сілтемелер мен файлдарды ашпаңыз.
- Қашықтан қол жеткізу қосымшаларын орнатпаңыз (мысалы, HopToDesk, RustDesk, AnyDesk және т.б.).
- Мемлекеттік орган немесе Ұлттық Банк қызметкерінің атынан белгісіз қоңырау шалынса, әңгімені дереу тоқтатыңыз және ресми нөмірлер арқылы байланысыңыз.
Алаяқтыққа тап болсаңыз:
Құқық қорғау органдарына жүгініңіз.
Кеңес алу үшін Қазақстан Ұлттық Банкінің байланыс орталығына 1477 нөмірі арқылы хабарласуға болады.