Қазақстан темір жолы кейінгі 10 айда 30 адамның қатысуымен апат болғанын мәлімдеді, - деп хабарлайды Aqshamnews.kz тілшісі.
"Қазақстан темір жолы" ұлттық компаниясы теміржол нысандарында тіркелген жазатайым оқиғалар бойынша дабылды статистика жариялады. 2025 жылдың алғашқы 10 айында ел бойынша пойыздың адамдарды қағу дерегі 30 рет тіркелген. Оқиғалар салдарынан 34 адам зардап шегіп, оның 15-і қаза тапқан, 19-ы түрлі жарақат алған. Жәбірленушілердің қатарында үш кәмелетке толмаған жасөспірім бар.
Компания мәліметінше, оқиғалардың басым бөлігі азаматтардың теміржолда жүру ережелерін өрескел бұзуынан болған. Зардап шеккендердің 40%-ы (12 адам) оқиға кезінде мас күйде болған. Басқа жағдайларда адамдар құлаққап киіп жүрген. Бір суицид фактісі де тіркелген.
Сонымен қатар кейінгі 10 айда теміржолда 24 жол-көлік оқиғасы болған, оның үшеуіне жолаушылар пойыздары қатысқан.
ҚТЖ, әскери күзет және желілік полиция бірлесіп 1 570 рейд жүргізіп, 2 105 тұрғын жиналысын ұйымдастырған. Нәтижесінде ережені бұзғандарға 39 әкімшілік айыппұл салынған.
Компания теміржолдағы қауіпсіздік ең алдымен азаматтардың жауапкершілігіне байланысты екенін атап өтіп, жолды тек белгіленген жерден кесіп өтуге және теміржол маңында аса сақ болуға шақырды.