Естеріңізге сала кетсек, Қырғызстан командасының көкпаршылары марапаттау рәсімі кезінде екінші орынға берілген медальді шешіп тастап, жеңген Қазақстан командасының гимнін тыңдамай кетіп қалған болатын.
Қазақстанның көкпар Федерациясы Қырғызстанмен реванш матчын өткізуден бас тарту себебін түсіндірді, деп хабарлайды aqshamnews.kz
Федерация көкпардан өткен Бесінші Дүниежүзілік көшпенділер ойындарының нәтижелеріне қатысты пікір білдіріп, Қазақстан мен Қырғызстан командалары арасындағы финалдық матч кезінде туындаған дауларға тоқталды. Федерация өкінішпен, ойыннан гөрі "туындаған түсініспеушіліктер" көпшілік назарын аударғанын айтты.
"Біріншіден, ереже бұзған қазақстандық спортшы жазаланып, екі минутқа айып алаңына жіберілді. Екіншіден, қырғыз делегациясынан төрешілерге ресми наразылық түспеді. Қазақстанның көкпар Федерациясы барлық даулар спорттық этика аясында шешілуі керек екенін атап көрсетеді. Сондай-ақ, біз әлеуметтік желілерде қазақстандық спортшыларға қатысты айтылған жағымсыз пікірлер мен қорлауды айыптаймыз",-деп атап өтті Федерация өкілдері.