Эр-Риядта өткен VI Ислам ынтымақтастығы ойындары аяқталып, қазақстандық спортшылар жарысты табысты қорытындылады. Бұл туралы Aqshamnews тілшісі Туризм және спорт министрлігінің баспасөз қызметіне сілтеме жасап хабарлайды.
Министрлік мәліметінше, жарыс «One nation – бір ұлт» ұранымен өтіп, 57 елдің спортшылары бақ сынаған. Қазақстан құрамасы жалпы есепте 56 медаль жеңіп алды: 15 алтын, 20 күміс және 21 қола. Бұл нәтиже ел спортшыларының жоғары дайындығын және халықаралық аренадағы тұрақты өсімін көрсетеді.
Қазақстан 16 спорт түрінен қатысты: жеңіл атлетика, киберспорт, фехтование, гандбол, джиу-джитсу, дзюдо, карате, жүзу, үстел теннисі, таэквондо, ауыр атлетика, еркін күрес, грек-рим күресі, әйелдер күресі, ушу және муай-тай.
Ал бокс, волейбол, ат спорты, 3х3 баскетбол, футзал, дуатлон және түйе жарыстары объективті себептерге байланысты қатыспады.
Ойындардың басты жетістіктері:
- Қазақстан алғаш рет бірнеше спорт түрінен алтын медаль иеленді: дзюдо (Аруна Жангельдина), үстел теннисі (Кирилл Герасименко және ерлер командасы), муай-тай (Тұрар Дүйсехан), семсерлесу (ерлер командасы) және джиу-джитсу (үш алтын).
- Спорттық реванш: үстел теннисінде Кирилл Герасименко Париж Олимпиадасында өзі жеңілген Омар Мухаммед Ассарды тізе бүктірді; ал әлем чемпионы Ризабек Айтмұхан Бахрейннің Олимпиада чемпионы Ахмед Тажудиновты ұтты.
- Алғаш рет гандбол, джиу-джитсу, муай-тай, ушу және фехтование спорттарынан медальдар еншілeді.
Осылайша, Қазақстан құрамасы VI Ислам ынтымақтастығы ойындарын жарқын нәтижемен аяқтады.
