Қазақстан Президенті Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде еліміздің төлқұжаты – көк паспорттың маңызына ерекше тоқталды. Ол бұл құжаттың қазіргі таңда тек жеке бас куәлігі ғана емес, ұлттық бірегейліктің нышанына айналғанын атап өтті. Бұл туралы Aqshamnews.kz сайты хабарлайды.
Мемлекет басшысының айтуынша, Қазақстан Республикасы төлқұжатының халықаралық деңгейдегі абыройы жыл өткен сайын артып келеді. Бұл еліміздің сыртқы саясаттағы салмағы мен ішкі тұрақтылығының нәтижесі.
"Көк паспортымыз ұлттық бірегейлігіміздің айқын нышанына айналды. Жыл өткен сайын төлқұжатымыздың абырой-беделі көтеріліп келеді", – деді Президент.
Бүгінде Қазақстанды тұрақты тұруға немесе саяхаттауға қолайлы ел ретінде таңдайтын шетелдік азаматтардың саны артып келеді. Бұл – еліміздің бейбіт, қауіпсіз, ашық қоғам орнатудағы жетістіктерінің нақты көрінісі.
Тоқаев Қазақстанның халықаралық рейтингтердегі позициясына да тоқталып, бұл көрсеткіштердің мемлекеттің даму деңгейін нақты айқындайтынын айтты.
"Қазақстан беделді халықаралық рейтингтердегі қауіпсіздік индексі бойынша айналамыздағы көптеген мемлекеттердің бәрінің дерлік алдында тұр", – деді Мемлекет басшысы.
Сонымен қатар, «Тәртіп пен қауіпсіздік» көрсеткіші бойынша еліміз 142 елдің ішінен 43-орынға жайғасқан. Бұл – құқықтық тәртіп пен азаматтардың қорғанысының халықаралық деңгейде мойындалуы.
Көк паспорт бүгінде тек азаматтықтың белгісі ғана емес, Қазақстанның ішкі тұрақтылығы мен халықаралық аренадағы беделінің символына айналды. Мемлекет басшысы атап өткендей, бұл – ел тәуелсіздігінің, ұлттық бірегейліктің және дамыған құқықтық жүйенің нақты көрінісі.