Аталған құжатқа Мемлекет басшысының Қытай Халық Республикасына ресми сапары барысында қол қойылды
Қасым-Жомарт Тоқаев пен Си Цзиньпиннің келіссөздері аяқталғаннан кейін ҚР Көлік министрлігі мен ҚХР Даму және реформалар жөніндегі мемлекеттік комитеті арасында «Аягөз-Тачэн» темір жолын салу жобасы бойынша ынтымақтастықты бірлесіп дамыту жөніндегі өзара түсіністік туралы Меморандумға қол қойды. Маңызды құжатқа қазақстандық тараптан Көлік министрі Марат Қарабаев қол қойды, деп хабарлайды Almaty-akshamy.kz Көлік министрлігіне сілтеме жасап.
ҚР Президенті Қасым-Жомарт Тоқаев пен ҚХР Төрағасы Си Цзиньпиннің 2023 жылғы мамырдағы бірлескен мәлімдемесінде көрсетілген Қазақстан мен Қытай арасындағы үшінші трансшекаралық теміржол бойынша маңызды уағдаластықты белсенді іске асыру мақсатында екі елдің жауапты ведомстволары төмендегі бөлімдер бойынша өзара түсіністікке келді:
- Қазақстан мен Қытай арасындағы жерүсті көлік инфрақұрылымының өзара байланысының деңгейін арттыру мақсатында тараптар Қазақстан мен Қытай шекарасында үшінші трансшекаралық теміржол мен өткізу пунктін ашу мүмкіндігін зерделеуге қызығушылық білдіреді. Осыған байланысты, тараптар «Бақты – Покиту» өткізу пунктінде Қазақстан мен Қытай арасындағы трансшекаралық теміржол жолдары құрылысының орындылығын алдын ала зерделеу үшін осы өзара түсіністік туралы меморандум шеңберінде өзара іс-қимыл жасауға дайын.
- Тараптар өз елдерінің тиісті ведомстволарымен олардың трансшекаралық теміржол ынтымақтастығын іске асыруды алдын ала зерделеу функцияларына сәйкес жұмысты ұйымдастыру жөнінде бастамашлық жасауға дайын.
- Тараптар халықаралық тәжірибеге сәйкес өз мемлекеттерінің аумақтарында учаскелерді алдын ала зерттеуді, жобалауды, салуды және қаржыландыруды жүзеге асыратынын атап өтті.
- Теміржолдың қиылысу нүктесі анықталғаннан кейін Тараптар осы Меморандум шеңберінде трансшекаралық теміржол қатынасының схемасын әзірлеуді аяқтауға қатысты байланыстарды қолдайтын болады, оның ішінде Тараптар жүктерді тасымалдаудың ықтимал әлеуетті көлемдері туралы ақпарат алмасатын болады.