Қазақстан Конституциясының 30 жылдығына орай рақымшылық туралы заң жобасы қаралуда
Парламент Мәжілісінің жалпы отырысында «Қазақстан Республикасының Конституциясына 30 жыл толуына байланысты рақымшылық жасау туралы» заң жобасы қаралуда. Құжатты Парламенттің бір топ депутаты әзірлеген.
Заң жобасы – қателік жасаған, бірақ өз ісіне өкініп, түзелу жолына түскен азаматтарға мемлекет тарапынан жасалатын ізгілік актісі ретінде ұсынылып отыр.
Жоба аясында:
• Қылмыстық теріс қылықтар мен онша ауыр емес қылмыстар жасаған адамдарды;
• Залал келтірмеген немесе оны толық өтеген орташа ауырлықтағы қылмыстар үшін сотталғандарды;
• Әлеуметтік осал топтарға жататын, орташа ауырлықтағы қылмыс жасаған азаматтарды босату көзделген.
Сондай-ақ, онша ауыр емес және орташа ауырлықтағы қылмыстар бойынша қозғалған, бірақ сотта қаралмаған істерді тоқтату қарастырылып отыр.
Бұдан бөлек, ауыр және аса ауыр қылмыстар жасағандарға қатысты жаза мерзімін қысқарту мүмкіндігі ұсынылады. Сеніп тапсырылған мүлікті иемденгені немесе талан-таражға салғаны, алаяқтық жасағаны үшін сотталған тұлғалар залалды толық өтеген жағдайда жаза мерзімінің бестен бір бөлігі қысқартылуы мүмкін.
Сонымен қатар, денсаулыққа қасақана зиян келтіру, мемлекеттік құпияларды жариялау, сыбайлас жемқорлық сияқты кейбір қылмыстарға рақымшылық қолдануға шектеу енгізу ұсынылды.