Мемлекет басшысы Өзбекстан Президентін ел Тәуелсіздігімен құттықтады
Президент Қасым-Жомарт Тоқаев жеке өзінің және барша қазақстандықтардың атынан Өзбекстан Президенті Шавкат Мирзиёевті және өзбек халқын ел Тәуелсіздігінің 30 жылдығымен құттықтады, деп хабарлайды almaty-akshamy.kz Ақорда сайтына сілтеме жасап.
«Бауырлас Өзбекстан бұл айтулы күнге ұлттық біртұтастығымен, экономикалық дамуының жоғары қарқынымен және әлемдік қоғамдастықта лайықты беделімен қуатты әрі өркендеген мемлекет ретінде жетіп отыр. Өзбек халқы Сіздің жасампаздық саясатыңыз бен табысты жүзеге асып жатқан ауқымды реформаларыңызды қолдай отырып, тұрақты даму жолын жалғастыра беретініне сенімдімін», – деп жазылған Мемлекет басшысының жеделхатында.
Қасым-Жомарт Тоқаев екі ел арасындағы тарихы терең стратегиялық ынтымақтастыққа жоғары баға берді. Жеделхатта мемлекет басшысы екі ел арасында атқарылып жатқан жұмыс екіжақты деңгейде де, аймақтық және халықаралық ынтымақтастық аясында да Қазақстан мен Өзбекстанның өзара іс-қимылындағы зор әлеуетті толық іске асыру үшін қызмет ететініне сенім білдіретінін айтқан.
Қасым-Жомарт Тоқаев Шавкат Мирзиёевке жауапты мемлекеттік қызметте табыс, бауырлас Өзбекстан халқына өркендеу мен өрлеу тіледі.