Қасым-Жомарт Тоқаев Kaspi.kz компаниясының негізін қалаушылар Вячеслав Ким мен Михаил Ломтадзені қабылдады, деп хабарлайды aqshamnews.kz
Президент Қасым-Жомарт Тоқаев Kaspi.kz компаниясының қызметі туралы және шағын және орта бизнесті дамытуға арналған жаңа сервисті құру жоспары жайлы мәлімет алды.
Ұсынылған ақпаратқа сәйкес, бүгінгі таңда 700 мыңға жуық отандық кәсіпкер өз бизнесін Kaspi.kz технологияларының көмегімен дамытып жатыр. Биылғы бірінші жартыжылдықта тауарлар мен қызметтер үшін 12 триллион теңге көлемінде қолма-қол ақшасыз төлем жасалып, 150 мың жеке кәсіпкер тіркелген.
Мемлекеттік органдармен бірлесіп әзірленген онлайн-сервистердің арқасында қазақстандықтар салықтарды уақытында төлеу мүмкіндігіне ие болды. 2024 жылдың алғашқы алты айында осы қызметтер арқылы бюджетке 1,1 триллион теңгеден астам салықтар мен басқа да төлемдер түскен.
Қасым-Жомарт Тоқаев еліміздегі шағын және орта кәсіпкерлікті дамыту маңызды екенін атап өтіп, Kaspi.kz акционерлеріне қолдау білдірді.