Қазақстанда 1 қазан – Қарттар күніне орай өңірлерде зейнеткерлерге әртүрлі көлемде әлеуметтік көмек көрсетіледі, - деп хабарлайды Aqshamnews.kz.
Астана
Елордада 100 мыңнан астам зейнеткерге 2,5 АЕК көлемінде (шамамен 9 830 теңге) біржолғы төлем беріледі. Бұл бастама былтырғы дәстүр бойынша жалғасып отыр.
Алматы
Алматыда қаржылай көмек қарастырылмаған. Қала билігінің мәліметінше, зейнеткерлерге қолдау 13 түрлі әлеуметтік қызмет арқылы жүзеге асады.
Шымкент
Мегаполисте 70 жастан асқан қарияларға 3 АЕК (11 796 теңге) көлемінде біржолғы көмек беріледі. Ал 80 жастан асқан жалғызілікті қарттарға ай сайын 2 АЕК (7 864 теңге) әлеуметтік төлем қарастырылған.
Атырау облысы
Бұл өңірде мүгедектігі бар зейнеткерлерге қазан айында 7,5 АЕК (29 490 теңге) көлемінде біржолғы көмек төленеді. Сонымен бірге «Теңізшевройлдың» қолдауымен 2023-2025 жылдар аралығында 300-ге жуық қария Атырау шипажайында ем қабылдайды.
Ақтөбе облысы
Мұнда біржолғы өтемақы берілмейді. Әкімдіктің мәліметінше, қарттарға төлем Конституция күні жасалғандықтан, Қарттар күніне арнайы қаржы қарастырылмаған. Дегенмен мерекелік іс-шаралар өтеді.
Қарағанды облысы
Өңірде 70 жастан асқан 51 мыңнан астам зейнеткерге біржолғы төлем беріледі. Әкімдіктің хабарлауынша, жергілікті бюджеттен 1 млрд теңгеден астам қаржы бөлінген. Сома қала-аудандарға қарай 10 мыңнан 20 мың теңгеге дейін өзгеріп отырады.
Маңғыстау облысы
Өңірде 70 жастан асқан 24 мыңнан астам қарияға аудандық және қалалық мәслихаттардың шешімімен 15 мың теңге көлемінде біржолғы көмек төленеді.