Апелляциялық саты қарт әкесін жүйелі түрде соққыға жыққан ер адамның үкімін қайта қарады. Сот прокуратураның шағымын қанағаттандырып, сотталушының жазасын 5 жылдан 6 жылға дейін ұзартты, – деп хабарлайды aqshamnews.kz тілшісі.
Соттың баспасөз қызметінің мәліметінше, 31 наурызда апелляциялық алқа прокуратураның жазаны қатаңдату туралы өтінішін қанағаттандырған. Нәтижесінде сотталушыға бұрын тағайындалған 5 жыл емес, 6 жыл бас бостандығынан айыру жазасы кесілді.
Соттағылардың түсіндіруінше, айыптау баптары өзгеріссіз қалған. Ер адам бұрынғыдай «Қинау» және «Денсаулыққа қасақана орташа ауырлықтағы зиян келтіру» баптары бойынша кінәлі деп танылған, алайда жаза мерзімі қатаңдатылған.
Апелляциялық саты сотталушының әрекетін ауыр әрі қоғамға қауіпті деп бағалаған. Сот алқасы оның туған әкесінің дәрменсіз жағдайын пайдаланып, оған ұзақ уақыт бойы күш көрсетіп, азаптағанын атап өтті.
Сонымен қатар сот марқұм болған әкесі туралы құқық қорғау органдарына бірден хабар бермей, бірден жерлеу рәсімдерін ұйымдастыруға кіріскенін де жаза мерзімін күшейтуге негіз болған мән-жайлардың бірі ретінде көрсеткен.
Айта кетейік, іс бойынша бастапқыда сотталушының жұбайына қатысты қылмыстық қудалау тергеу кезеңінде тоқтатылған.