Қарағандыда есірткі айналымы мен контрабандасына қатысты іс бойынша үкім шықты, - деп хабарлайды aqshamnews.kz тілшісі.
Қарағандыда есірткі заттарының заңсыз айналымы және контрабандасына байланысты қылмыстық іс қаралып, сот үкімі жарияланды. Тергеу жұмыстары Бас көлік прокуратурасының үйлестіруімен Қаржы мониторингі агенттігінің (ҚМА) Қарағанды облысы бойынша департаменті тарапынан жүргізілген.
Тергеу мәліметінше, колледж студенттерінің бірі есірткі таратудан табыс табуға болатынын біліп, "Telegram" мессенджері арқылы белгісіз куратормен байланысқа шыққан. Ол "жасырма-курьер" және "қойма" қызметін атқаруға келісіп, тапсырмалар алған.
Айыпталушының міндетіне берілген координаталар бойынша есірткі заттарын алып кету, сақтау, бөліп орау, тасымалдау және қала аумағында алдын ала белгіленген жасырын орындарға орналастыру кірген. Тергеу дерегіне сәйкес, ол күніне шамамен 30 жасырма жасаған.
Сонымен қатар, сотталушы Таиландтан Қазақстанға халықаралық пошта жөнелтімі арқылы есірткі жеткізуді ұйымдастырғаны анықталды. Бұл мақсатта ол "Telegram" арқылы 400 мың теңге сыйақы ұсына отырып, кәмелетке толмаған "дропперді" тартып, жөнелтімді оның атына рәсімдеген.
Күдікті тауарды алу кезінде ұсталып, одан 909 грамм каннабис экстракты тәркіленді. Тінту барысында оның тұрғылықты мекенжайынан қосымша 80 грамм есірткі заты табылып, алынған.
Сондай-ақ, ұялы телефонын тексеру кезінде оның бір күн бұрын бірнеше жасырма орналастырғаны белгілі болды. Көрсетілген координаталар бойынша тағы 3,34 грамм каннабис экстракты тәркіленді.
Сот үкімімен айыпталушы 15 жыл мерзімге бас бостандығынан айырылды. Үкім әзірге заңды күшіне енген жоқ.