Борис Керімбаевты еске алуға арналған конференция өтті
Жазушылар одағының мәжіліс залында ауған соғысының ардагері Борис Керімбаевты еске алу құрметіне арналған «Ер есімі – ел есінде» атты ғылыми-практикалық конференция өтті.
Алматы әкімдігінің қолдауымен «Ұлы Дала» қоғамдық бірлестігі, Республикалық ауған соғысы ардагерлері мен мүгедектері ЗТБ орталық кеңесі ұйымдастырған басқосу жиында Ауған соғысы тарихына «Қара майор» есімімен енген Борис Төкенұлы Керімбаевтың өмір жолы, майдан жолы жайлы қоғам қайраткерлері мен ғалымдар байыпты баяндама жасап, оның кейінгі ұрпаққа ұлағаты айтылды, батырдың рухына тағзым етілді. КСРО ҚМ БББ (ГРУ)-дің Керімбаев қолбасшылық еткен жасағы орталық азиялық сайдың тасындай іріктелген сақадай сай сардарлар мен сарбаздар болатын. Ауған жеріндегі Панджер шатқалын жыл бойы тас қамал қып қорғаған «Қара майорды» қарсыласы, атышулы Ауған командирі Ахмад Шах Масудтің өзі амалсыз мойындап, оның басына миллион доллар тіккен деседі.
Запасқа шыққан офицер Керімбаев тәуелсіз еліміздің әскери қызметшілерімен өзінің орасан зор тәжірибесімен бөлісіп, жастарды ел қорғауға тәрбиелеп, отан[1]шылдыққа баулыды. Конференцияға қатысқан Ауған соғысының ардагерлері, белгілі қоғам қайраткерлері, ғылым мен мәдениет өкілдері Керімбаевтың жауынгерлік жолы – антқа адалдық пен ерлікке толы екеніне тоқталды .Конференцияға қатысушылар Борис Керімбаевты есімі еліміздің соғыста ерен ерлігімен танылған батырлар қатарынан орын алуға әбден лайық деген тоқтамға келді.
Марат ҚОЙЛЫБАЕВ, Республикалық ауған соғысы ардагерлері мен мүгедектері ЗТБ орталық кеңесінің төрағасы:
ӘСКЕРИ АНТЫНА АДАЛ БОЛДЫ
Өткен ғасырда тағдыры маңдайымызға жазылған Ауғанстандағы соғысқа біз интернационалдық борышымызды өтеуге бардық. Борис Керімбаев – сол соғыста қолбасшы (командир) ретінде қаншама сарбаздың елге тірі келуіне барын салған сұңғыла сардар. Бізге маңыздысы – әскери антына ақырына дейін адал болған Керімбаевтың керемет ерлік үлгісін өскелең ұрпаққа өнеге ету. Оның ер жігітке тән жігерлілігі мен ұстанымдылығын кейінгі ұрпақ – жарқын болашақтың жастары, сарбаздар мен сардарлар білуі тиіс. Біз соғысты іздеген жоқпыз, соғыс бізді тапты. Біз соғысты тілеген жоқпыз, тілемейміз. Ендігі жастар бейбіт заманның батырлары болсын!