"Дикий Арман" ісі бойынша үкім қаңтардың басында шығуы мүмкін
Арман Жұмагелдиевке (Дикий Арман) қатысты сот ісі аяқталуға жақын. Бұл туралы оның адвокаты Олег Чернов мәлімдеді, - деп хабарлайды aqshamnews.kz
"Арман Жұмагелдиев ісі бойынша сот тергеуі аяқталды. Қазір прокурор айыптаушы тарап ретінде сөйлеп жатыр. Айыпталушылар үшін үлкен мерзімдер сұралуда. Желтоқсанның соңына дейін процесті аяқтап, қаңтардың басында үкім жарияланады деп ойлаймын", – деді адвокат.
Криминалдық авторитет ретінде танылған Арман Жұмагелдиевтің ісі сотқа өткен жылдан бері қаралып жатыр. Сотталушылар қатарында бұрынғы Алматы мәслихатының депутаты Қайрат Құдайберген де бар.
Жұмагелдиевке Қаңтар оқиғасы кезінде жаппай тәртіпсіздіктерді ұйымдастыру, оған қатысу, атыс қаруын ұрлау және заңсыз бас бостандығынан айыру айыптары тағылған. Ал Құдайберген, тергеу нұсқасы бойынша, "Дикий Арманға" қосылуға белсенді түрде шақырған.