Мамандар дүрлігуге жол бермеуге шақырады.
Қазақстан Республикасы Бәсекелестікті қорғау және дамыту агенттігінің Алматы қаласы бойынша департаменті баға мониторингінің нәтижелері бойынша қант бағасының алыпсатарлық өсу белгілерін анықтады, деп хабарлайды Almaty-akshamy.kz.
«Қазіргі уақытта нарық субъектілерінің басым үлесін айқындау мақсатында ірі өнім берушілердің атына сұрау салулар жіберілді. Монополияға қарсы талқылау қорытындылары бойынша тиісті ден қою шаралары қабылданатын болады», - делінген департаменттің баспасөз қызметінің хабарламасында.
Монополияға қарсы департамент дүрлігуге жол бермеуге шақырады және бәсекелестікке қарсы келісімдер, келісілген іс-әрекеттер нәтижесінде алыпсатарлық бағаның өсуі, сондай-ақ үстем жағдайды теріс пайдалану монополиялық табысты (таза пайданы) тәркілей отырып, табыстың 3-5%-ы мөлшерінде айыппұл салуға әкеп соғатынын ескертеді.