Бірлесіп атқарған жұмыстары үшін алғысын айтты.
Алматы полиция департаментінің бұрынғы жетекшісі Қанат Таймерденов алматылықтарға әлеуметтік желілер арқылы алғысын білдірді, деп хабарлады Almaty-akshamy.kz.
«Қымбатты достар!
Құрметті алматылықтар!
Екі жарым жыл бойы біз бірге еліміздің ең ірі шаһарында заңдылық пен тәртіпті қамтамасыз ету және азаматтардың қауіпсіздігіне қатысты өзекті мәселелерді шешу үшін тығыз жұмыс жасадық.
Менің тәжірибемде бұл қаладағы қылмыстық жағдайды тұрақтандыруға және жазатайым оқиғаларды азайтуға мүмкіндік берген қоғаммен ең жемісті ынтымақтастық болды десем де болады.
Сіздермен бірге қалалық қоғамдық көліктерді, жалпы білім беретін мектептерді, колледждерді, азаматтардың жаппай жүретін орындарын, сондай-ақ тергеушілер, анықтаушылар мен жедел уәкілдердің кабинеттерін қамтитын бейнебақылау жүйелерін кеңейту мәселелері де шешілді.
Сонымен қатар, Алматы полициясының қызметтік үлгіге көшуінің аралық қорытындылары шығарылды.
Қоғам белсенділерімен бірлесе отырып, таяу болашаққа арналған басым жоспарлар белгіленді.
Бір сөзбен айтқанда, бүгінде Алматыда қылмыстық жағдай тұрақты және бақылауда.Әлі де атқарылатын жұмыстар бар екендігі рас.
Достар!
Сіздерді алдағы уақытта да қаладағы қауіпсіздік пен құқықтық тәртіпті қамтамасыз ету мәселелерін шешуге белсенді атсалысуға шақырамын.Бірлескен жұмыстарыңыз үшін алғысымды айтамын.
Алматы қаласы ПД қызметтері мен бөлімшелерінің жеке құрамына жанқиярлық және кәсіби еңбектері үшін ерекше алғыс айтамын», - деп жазды Қанат Таймерденов.
Бұдан бұрын белгілі болғандай, Қанат Таймерденов Алматы полиция департаментінің бастығы қызметінен кеткен болатын.
«Қанат Таймерденов Ішкі істер министрлігінің орталық аппаратына басшылық қызметке ауыстырылуда», - делінген ІІМ баспасөз қызметінің хабарамасында.