Жекпе-жек кеші Плант-Ситиде өтті
Бүгін қазақстандық боксшы Қанат Ислам кәсіпқой бокста тұңғыш рет жеңіліс тапты, деп хабарлайды Almaty-akshamy.kz ҚазАқпаратқа сілтеме жасап.
Ол WBO Global чемпиондық белбеуін үшін британдық Джимми Келлимен (25-2, 10 КО) жұдырықтасты. 10 раундқа созылған жек-жек қорытындысында төрешілер бірауыздан Келлиді жеңімпаз деп тапты. Осылайша, қазақстандық кәсіпқой боксшы алғаш рет қарсыласына жол берді.
Жекпе-жек кеші Плант-Ситиде (Флорида штаты, АҚШ) өтті.
Естеріңізге сала кетейік, Қанат Ислам алғашқы жоспар бойынша 2022 жылдың 21 қаңтарында жұдырықтасуы керек болатын.
Алайда, коронавирус шектеулеріне байланысты жарыс кейінге шегерілді. Джимми Келли соңғы кездесуін өткен жылдың 12 желтоқсанында өзнің отандасы Гарри Мэттьюспен (16-50-3, 2 КО) өткізіп, қарсыласын нокаутқа жіберген.
Ал Қанат Ислам соңғы жекпе-жегін өткен жылы 20 ақпан күні Майамиде өткізді. Эквадорлық боксшы Джейсон Миндумен (14-5-1, 8 КО) болған жекпе-жектің жетінші раундында қарсыласын техникалық нокаутпен жеңген.