Алматыда Дүниежүзілік тазалық күні мен Қала күніне орай ауқымды жалпықалалық сенбілік өтті. Экологиялық акцияға 50 мыңнан астам адам қатысты, – деп хабарлайды aqshamnews.kz тілшісі.
Іс-шаралар Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» жалпыұлттық бағдарламасы аясында қаланың барлық ауданында ұйымдастырылды.
Негізгі алаңдардың бірі «Аюсай» визит орталығы болды. Мұнда мыңнан астам адам жиналды. Сенбілікке Алматы қаласының әкімі Дархан Сатыбалды да қосылды. Ол тұрғындармен, жастармен, еріктілермен және қалалық қызмет өкілдерімен бірге көшет отырғызуға қатысты. «Аюсай» аумағына 100 қылқан жапырақты ағаш, оның ішінде 50 қарағай мен 50 шырша егілді.
Тазалық жұмыстары бір мезетте қаланың барлық аумағында жүргізілді. Сенбілікке қатысушылар саябақтар мен скверлерді, аулалар мен қоғамдық кеңістіктерді, демалыс орындарын ретке келтірді. Сенбілік аясында Алматыда 1 мыңнан астам ағаш егілді. Игі іске студенттер, еріктілер, қоғамдық ұйымдар, коммуналдық қызметтер, кәсіпорындар мен мекеме қызметкерлері атсалысты.
«Таза Қазақстан» жалпыұлттық бағдарламасы қоршаған ортаға ұқыпты қарауды және тазалық мәдениетін қалыптастыруға бағытталған. Мемлекет басшысы бірнеше рет атап өткендей, бұл жұмыс жүйелі түрде жүргізіліп, күнделікті өмір салтының бір бөлігіне айналуы керек.
Қала күнімен тұспа-тұс келген Дүниежүзілік тазалық күні мерекелік және экологиялық бастамаларды біріктірді. Ондаған мың алматылық қала мен оның жасыл аумағын көркейтуге үлес қосты.