Джо Байден БҰҰ алдында соңғы рет АҚШ президенті ретінде сөз сөйледі
Байден өзінің АҚШ президенті ретіндегі соңғы сөзін БҰҰ-ның 79-шы сессиясында жасады. Бұл жолы оның баяндамасының басты тақырыбы Украина мен Таяу Шығыстағы қақтығыстар болды.
Президенттің айтуынша, Украина әділ әрі тұрақты бейбітшілікке қол жеткізгенге дейін қолдауды қажет етеді, ал Таяу Шығыста жағдайдың шиеленісуіне қарамастан, дипломатиялық шешімдерге мүмкіндік бар.
«Мен баршаңызды Украинамен иық тіресіп бірге болуға шақырамын. Путин бұл соғыста жеңіліс тауып жатыр, өйткені Украина еркіндігін сақтап қалды! Ол НАТО-ны әлсіретуді көздегенімен, қазір НАТО бұрынғыдан да біртұтас. Біз Украинаға қолдау көрсетуді тоқтатпауымыз керек. БҰҰ Жарғысына сәйкес, Украинаға тұрақты бейбітшілік орнатуға көмектесу үшін бар күшімізді салуымыз қажет», — деп мәлімдеді Байден.
Сонымен қатар, ол БҰҰ мен Қауіпсіздік Кеңесіне де өзгерістер енгізу керектігін айтты:
«Біз күшті, тиімді және инклюзивті БҰҰ құруымыз қажет. Бұл ұйым жаңа дауыстар мен жаңа көзқарастарды тыңдап, соған бейімделуі тиіс. Сондықтан біз Қауіпсіздік Кеңесін реформалауды және оны кеңейтуді қолдаймыз. Алға жылжитын уақыт келді, Қауіпсіздік Кеңесі өзінің басты міндеті — бейбітшілікті орнатуға қайта оралуы керек», — деді Байден.
Сөзінің соңында Байден екінші мерзімге үміткер болмайтыны туралы шешімінің себебін түсіндірді:
«Менің президенттігімнің басты мақсаты — демократияны қорғау болды. Биылғы жазда мен президент ретінде екінші мерзімге түсемін бе деген сұрақты шешуім керек еді. Бұл оңай шешім болмады, президент болу — менің өмірімдегі ең үлкен құрмет. Көп нәрсені жүзеге асырғым келетін... Бірақ жұмысқа деген сүйіспеншілігімнен де елге деген махаббатым артық», — деп түйіндеді Байден.