Өзбекстанда күннің қатты ысыуына байланысты пойыздардың жылдамдығы шектеледі, - деп хабарлайды аlmaty-akshamy.kz.
"Узтемирйулйуловчи" баспасөз қызметінің мәліметіне сүйенсек, соңғы күндері Өзбекстан аумағында әдеттен тыс жоғары температура байқалған. Осыған байланысты, теміржол жолдары мен рельстердің болат элементтері айтарлықтай қызып кетеді. Сондай-ақ, ауаны баптау жүйелерінің бұзылуы мүмкін екені атап өтілді.
"Пойыздар мен жолаушылар қозғалысының қауіпсіздігін қамтамасыз ету мақсатында поездар қозғалысының жылдамдығына шектеулер енгізілді. Бұл пойыздардың кестеден кешігуіне әкелуі мүмкін. Сонымен қатар, жылдамдыққа шектеулер енгізілген пойыздарда ауаны баптау жүйелерінің тиімділігі төмендеуі мүмкін", - делінген хабарламада.