Перизат Қайрат 10 жылға бас бостандығынан айырылды, деп хабарлайды Aqshamnews.kz.
Елорда соты қоғамда үлкен резонанс тудырған Перизат Қайрат ісі бойынша үкім шығарды. Ол алаяқтық және қылмыстық жолмен алынған ақшаны заңдастыру баптары бойынша кінәлі деп танылды.
Сот Перизат Қайратты 10 жылға бас бостандығынан айыруға үкім етті. Оның анасы - Ғайни Алашбаева 8 жылға сотталды.
Үш эпизод бойынша айыптаулар тағайындалды:
— мүмкіндігі шектеулі балаларға көмек көрсету үшін жиналған қаражатты;
— Таяу Шығыста зардап шеккендерге арналған гуманитарлық көмекті;
— Қазақстандағы су тасқынынан зардап шеккендерге арналған қайырымдылық ақшасын жымқыру.
Сот айыпталушыларды Қылмыстық кодекстің келесі баптары бойынша кінәлі деп таныды:
-
аса ірі көлемдегі алаяқтық;
-
алдын ала сөз байласу арқылы адамдар тобы жасаған, қылмыстық жолмен алынған табысты заңдастыру;
-
аса ірі көлемдегі табысты жасыру және заңдастыру.
Перизат Қайрат пен оның анасының және адвокатының соңғы сөздері жабық сот отырысында тыңдалды. Бұған дейін қорғаушылар айыпталушылардың кінәсіздігін дәлелдейтін бұлтартпас айғақтар бар екенін айтқан болатын.
Перизат Қайрат өзіне тағылған айыптармен келіспейтінін мәлімдеді.
Перизат Қайрат ісі
Перизат Қайрат – Қазақстандағы қоғам белсендісі әрі кәсіпкер. Ол 2021 жылғы маусымда құрылған қайырымдылық қордың негізін қалаушы және басшысы ретінде танымал.
2024 жылғы қарашада Перизат Қайрат 1,5 миллиард теңгеден астам қаражатты жымқырды деген күдікпен ұсталды. Бұл қаражат су тасқынынан зардап шеккендерге көмек көрсету мақсатында жиналған болатын. Тергеу мәліметінше, қаражаттың бір бөлігі жеке мақсаттарға – жылжымайтын мүлік, автокөлік және қымбат шетелдік сапарларға жұмсалған.
Сондай-ақ Перизат Қайраттың қор қаражатын қолма-қол ақшаға айналдыру үшін дос-жарандары мен туыстарын тартқаны және оларға бұл қызметтері үшін сыйақы төлегені де айтылған.