Қазақстанда жаңа автокөліктердің бағасы төмендеп жатыр, деп хабарлайды aqshamnews.kz тілшісі.
Өнеркәсіп және құрылыс вице-министрі Олжас Сапарбековтің айтуынша, отандық өндірістегі көліктердің құны 17 пайызға арзандаған. Ал жалпы жаңа автокөліктердің бағасы қазан айында 14 пайызға төмендеген. Вице-министр автолизинг арқылы көлік сатып алу тиімділігі мен оған деген сұранысқа қатысты да пікір білдірді.
Оның сөзінше, көлікті сатып алу тәсілін әр азамат өзі таңдайды. Ал министрліктің мақсаты – халыққа қолайлы жағдай жасап, таңдау мүмкіндігін кеңейту. Сондай-ақ ол автокөлік бағасының төмендеуіне байланысты автонесиеге сұраныс азайып жатыр деген сарапшылардың пікіріне жауап берді.
«Несие де, бөліп төлеу де бар. Бұл мәселеге қатысты түрлі пікір айтылады. Алайда сарапшылардың қай салаға жататынын және талдауды қандай негізде жүргізетінін ескеру керек. Қалай болғанда да, біз халыққа көлік сатып алуға қолайлы жағдай жасау үшін барлық қажетті мүмкіндікті жасауды жалғастырамыз», – деді ҚР Өнеркәсіп және құрылыс вице-министрі Олжас Сапарбеков.