2025 жылдың 25-30 қазан күндері аралығында Алматыда «BI-Жұлдызай» қайырымдылық қорының «MUMKINDIK» жобасы аясында Педиатрия және балалар хирургиясы ғылыми орталығында Италияның «Ospedale del Cuore. Fondazine Toscana Gabriele Monasterio» (Масса қ., Италия) кардиология орталығының мамандары: балалар кардиохиругы Витали Пак, анестезиолог-реаниматолог Элиза Барбери, балалар кардиолыгы Кьяра Марроне қазақстандық дәрігерлерге шеберлік сабағын өткізіп, тәжірибелерімен бөлісті, - деп хабарлайды AqshamNews.kz.
Шеберлік сабағына Педиатрия орталығының балалар кардиохирург мамандары, сонымен қатар Алматы, Тараз, Ақтөбе, Астана қалаларының кардиохирургтары мен кардиологтары, анестезиолог-реаниматологтар мен рентгенхирургтар, сәулелік диагностика мамандары мен мейірбикелер қатысты.
Шеберлік сабағы аясында күрделі жүрек операциясын қажет ететін 6 балаға жүрек отасы жасалынды. Қазіргі таңда балалардың жағдайлары тұрақты, барлық балалар өкпенің жасанды желдету аппаратынан ажыратылды, 4 бала бөлімшеге емін жалғастыруға ауыстырылды. Барлық 6 балаға жасалған ота сәтті, асқынусыз өтті. Операциялар уақыты 4 сағаттан 6 сағатқа дейін созылды.
Одан бөлек 80-нен аса балаға консультация жүргізілді. Операциядан кейінгі пациентерге реанимация бөлімшесінде күнделікті қарау жүргізіліп, динамикада бақыланып, емі бойынша италияндық мамандармен бірге түзетулер енгізілді.
Италияның кардиохирург дәрігерлері Педиатрия орталығының кардиохирургтары мен реаниматологтарының және мейіргерлердің кәсіби деңгейінің жоғары екендігін атап өтті. Сонымен қатар, шеберлік сабақтары мен тәжірибе алмасу жалғасатынына сенімділік білдіріп, қазақстандық жас мамандарды Италия еліне біліктілігтерін арттыруға шақырды.
Қазақстандағы балалар кардиохирургиясының дамуына ықпал етіп, балалардың сауығып кетуіне және Отандық мамандардың дамуына, кәсіби деңгейін жетілдіруге мүмкіндік бергені үшін «BI-Жұлдызай» қайырымдылық қорының «MUMKINDIK» жобасына үлкен алғысымызды білдіреміз!
