Павлодар облысында әйел адамды өлтіріп, оның үйін тонамақ болған ер адам 10 жылға бас бостандығынан айырылды, деп хабарлайды Aqshamnews.kz тілшісі.
Павлодар облысында сот әйел адамды пышақтап өлтіріп, өзге бір үйді тонауға оқталған ер адамға қатысты үкім шығарды.Сот мәліметінше, қылмыс 2025 жылдың шілде айында Павлодар облысындағы Заря ауылында болған. Алдымен айыпталушы ауыл тұрғынының үйіне заңсыз кірген. Сол түні ол тағы бір жеке үйдің ауласына түсіп, мүлік ұрламақ болған. Алайда үй иесі оны байқап қалған. Осы кезде ер адам әйелге шабуыл жасап, оны пышақтап өлтірген.
Қылмыстың ізін жасыру үшін күдікті үй ішіндегі заттарды өртеп, оқиға орнынан қашып кеткен.
Сотта прокурор айыпталушыға 9 жыл бас бостандығынан айыру жазасын сұраған. Ал күдікті мен оның қорғаушысы тұрғын үйге заңсыз кіру дерегі бойынша ақтауды, ал кісі өлтіру бабымен ең төменгі жаза тағайындауды өтінген. Жәбірленуші тарап нақты мерзімге соттауды талап етті.
Сот ер адамның кінәсі толық дәлелденгенін атап өтті. Бұл жәбірленушілер мен куәгерлердің көрсетулері, сараптама қорытындылары және сотталушының өз кінәсін мойындауымен расталған.
Сот айыпталушының бұрын сотталмағанын, кінәсін мойындап, өкініш білдіргенін жеңілдететін мән-жайлар ретінде есепке алды. Ауырлататын жағдайлар анықталмаған.
Қылмыстардың жиынтығы бойынша ер адам 10 жылға бас бостандығынан айырылды. Үкім заңды күшіне әлі енген жоқ.
