4 қыркүйек. ҰҚК Шекара қызметінің Алматы облысы бойынша департаментіне қарасты Қарасай ауданы шекара басқармасының техникалық және кәсіби даярлық бөліміне әскерге шақырылған жас жігіттердің алғашқы легі келді.
Жылдағы дәстүр бойынша, бөлімнің бастығы подполковник С. Әуезов бастаған офицерлер мен сержанттар қақпадан алғаш болып кірген 40-қа жуық бозбаланы бауырсақпен қарсы алды. Облыс орталығы Қонаев қаласынан жеткізілген жас сарбаздардың жүздерінен қобалжу байқалады. Алайда, бұл уақытша жағдай екені анық. Бірнеше күннен соң олар әскери өмірге үйреніп, әскердің қатаң тәртібіне бой үйрететіні белгілі. Қақпадан енген болашақ сарбаздарды Қуандық Рахымның «Мен қазақпын» әні қарсы алып, олардың Отан алдындағы міндеттерін еске салды.
Әскери көліктен түскен жас сарбаздар сапқа тұрғызылып, алдына шекара басқармасы бастығының орынбасары, техникалық және кәсіби даярлық бөлімінің бастығы подполковник Сағадат Әуезов сөз сөйледі. Ол: «Отан қорғау – әрбір азаматтың қастерлі міндеті. Бүгіннен бастап, сендер үшін әскери өмірдің қарбалас кезеңі басталады. Мұнда сендер шекара күзетудің қыр-сырын меңгересіңдер», – деп, жас сарбаздарды жігерлендірді.
Сөз кезегін шекарашы ардагерлердің «Застава тарландары» республикалық қоғамдық бірлестігінің Алматы қалалық филиалының белсенді мүшесі, отставкадағы полковник Қазақбай Ертышбаев жалғастырды:
– Қырандарым, әскери өмірге қош келдіңдер! Осы сәттен бастап, сендер туған жердің тыныштығын күзететін сарбаздарға айналасыңдар. Бұл жерде сендерді тәжірибелі офицерлер әскери өмірге үйретеді. Мен де сендер секілді жас сарбаз болып, қолыма қару алдым. Өмір бойы шекараны күзетуге адал қызмет еттім, және сол үшін мемлекет мені марапаттады. «Шекараны үздік күзеткені үшін» медалі мен «Шекара қызметінің құрметті ардагері» атағына ие болдым. Міне, бүгін де сендер секілді жас сарбаздармен кездесіп, шекара қызметінің қызығы мен қиындығы туралы айтып келемін.
Үш айдан кейін сендер де осы жерде білім алып, шекараға аттанасыңдар. Сол уақытқа дейін талай рет кездесетін боламыз. Әскерде «Отан» деген сөздің мән-мағынасын терең түсініп, шекараға барған соң сендер мүлдем басқа адам болып шығасыңдар. Шекара сендерді шыңдап, ата-аналарыңның қадірін түсінуге, Отанды қорғауға жауапкершілікпен қарауға үйретеді. Бұл үшін сендер әскери тәртіпке бағынып, жақсы оқуға талпынуларың қажет. Мен сендерге сенемін! Қадамдарың құтты болсын!
Шекара қызметінің құрметті ардагері Қазақбай ағамыз жас сарбаздарға Парыз бен Борыштың, Отанға деген махаббат пен адалдықтың қасиетті жолын көрсетті.
– Күздің алғашқы аптасында әскерге шақырылған жас азаматтардың алғашқы легі келді. Бұл тек бастамасы. Ай соңына дейін тағы 500-дей сарбаз келеді деп күтілуде. Бүгін келген жас сарбаздарды алдымен медициналық тексеріс күтіп тұр, содан кейін олардың әрқайсысына арнайы тігіліп, өлшемі бойынша әскери форма беріледі. Бірақ бұл олардың шекарашы атанғанын білдірмейді. Алдымен олар әскери жаттығуларды өтіп, Ант қабылдаулары керек. Осыдан кейін ғана ел шебінің қорғаны деген мәртебелі атаққа ие болып, шынайы қару ұстауға мүмкіндік алады. Бұл толқынның қандай боларын уақыт көрсетеді.