Алматы қаласындағы №7 Қалалық клиникалық ауруханаға 30 жастағы ер адам бұлшық еттерінің ауырсынуынан және аяқтарын жаза алмауынан шағымданып жүгінген. Оның айтуынша, үш ай бұрын футбол ойыны кезінде тізесін жарақаттап алған, бірақ дәрігерге қаралмай, үйде өз бетінше емделген. Бұл туралы №7 ҚКА баспасөз қызметі хабарлады.
«Доп ойнап жүріп, науқас жүрелеп отырып, аяқтарын бірден созбақ болғанда буыны блокқа түсіп қалған. Пациентке «Медиалды менисктің үзілуі, тізе буынының блокқа түсуі, бұлшық еттің ауырсыну синдромы» деген диагноз қойылды. МРТ нәтижелері менисктің үзіліп кеткенін растады. Науқасқа МӘМС қаражаты есебінен тізе буынының артроскопиясы жасалды. Бұл органды сақтап қалуға бағытталған ота болып, медиалды менискке іш жағынан 4 тігіс салынды, мениск қайта тігілді», – деп түсіндірді Ортохирургия бөлімшесінің меңгерушісі Арнат Байзақов.
Дәрігерлер ота сәтті өткенін атап өтті, бірақ жарақат алған жағдайда уақытылы медициналық көмекке жүгінудің маңыздылығына тоқталды.
«Қимыл-қозғалыс аппараты зақымданған кезде дәрігерге дер кезінде жүгінбеу ауыр зардаптарға әкелуі мүмкін. Мұндай жарақаттар науқасты өз бетінше жүріп-тұру мүмкіндігінен айыруы ықтимал. Сондықтан өз бетінше емделуден, әсіресе «Гугл дәрігерге» сүйенуден сақ болған жөн. Уақытылы көмек алу – сауығудың басты шарты», – деді Арнат Байзақов.
Дәрігерлер халықты қимыл-қозғалыс жүйесінің жарақаттарына салғырт қарамауға және кез келген жағдайда кәсіби медициналық көмекке жүгінуге шақырды. Бұл ауыр зардаптардың алдын алып, қалпына келу процесін жеңілдетеді.