Талдықорғанда Орталық саябақ саудаға қойылды
Саябақты жөндеуге миллиард теңге жетпей, жергілікті билік оны сенімгерлік басқаруға беруді ұйғарды, деп хабарлайды aqshamnews.kz
Мұндай шешімге әкімдік саябақтың күтіміне кететін шығындардың көптігі себепті келгенге ұқсайды. Қала тұрғындарының сүйікті демалыс орнына айналған бұл нысан жаңғыртуды қажет етіп тұр.
Биыл наурыз айында Талдықорған қаласының тұрғын-үй коммуналдық шаруашылығы бөлімі (баланс ұстаушы) Орталық саябақты күрделі жөндеуден өткізу үшін тендер жариялаған болатын. Бұл мақсатқа бюджеттен бір миллиард теңгеден астам қаржы бөлінген еді.
Алайда тапсырыс беруші күтпеген жерден тендерден бас тартты. Сол уақыттан бері жаңа мемлекеттік сатып алу өткізілген жоқ. Оның орнына қараша айында қала әкімі Ернат Бәзіл саябақтың 41 437 шаршы метр аумағын сенімгерлік басқаруға беру туралы шешім шығарды.
Аукционға қатысқысы келетін үміткерлер кепілдік жарна ретінде 5,6 миллион теңгеден астам қаражат төлеуі керек.
Саябақтың тағдыры аукцион нәтижесіне байланысты болмақ.