Қазақстан мұсылмандары діни басқармасы пітір садақа мөлшерін жариялады, - деп хабарлайды aqshamnews.kz тілшісі.
2026 жылы пітір садақа - жан басына 735 теңге.
Пітір - оразаның қате-кемшіліктерін толтыратын, Құдайға шүкіршілік ету үшін берілетін және кедейлерді қуантатын садақа. Ханафи мәзһабі бойынша Рамазан айында мұсылман адам өзі және отбасы үшін пітір садақа беруі - уәжіп. Пітір садақа 2 келі бидай (ұн, талқан т.б.) не мейізбен немесе 4 келі құрма, арпамен есептеледі.
Пітір садақа Рамазан айы кіргеннен бастап Ораза айт намазына дейін беріледі.
"Уақытында бере алмаған жағдайда кейін берсе де болады, бірақ оның сауабы азаяды", - дейді пәтуа бөлімінің мамандары.
Ораза қашан басталады?
Рамазан айы 19 ақпанда басталады. Бұл туралы Қазақстан мұсылмандары діни басқармасының төрағасы, Бас мүфти Наурызбай қажы Тағанұлы мәлімдеді.
"Түркі мемлекеттері ұйымына қарасты мүфтилер алқасы жанындағы пәтуа кеңесін және ғылыми зерттеулер нәтижесін ескеріп, ортақ шешім қабылдадық. Алла қаласа, биыл Рамазан айы 19 ақпанда басталады", - деді Наурызбай қажы Тағанұлы.
Қадір түні, Ораза айт мерекесі қашан?
ҚМДБ мәліметінше, 17 наурызға қараған түн - қасиетті Қадір түні, ал 20 наурыз - Ораза айт мерекесі.