Оқушыларға «Заң мен Тәртіп» қағидаты түсіндірілді, – деп хабарлайды aqshamnews.kz тілшісі.
«Заң мен Тәртіп» қағидатын іске асыру жұмыстары аясында Алмалы ауданының прокуратурасы жастар арасында құқықтық мәдениетті қалыптастыруға, құқық бұзушылықтың алдын алуға бағытталған кездесу өткізді.
№216 мектепте өткен іс-шараға Алматы қаласы Алмалы ауданының прокуроры Әділет Сыздықов, Алмалы аудандық полиция басқармасы бастығының орынбасары Арман Китокпаев Елібекұлы, сондай-ақ Олимпиада ойындарының жүлдегері Жадыраев Демеу Нұрдәулетұлы қатысты.
Кездесу барысында Қазақстан Республикасы заңнамасының талаптарын сақтау, кәмелетке толмағандардың жауапкершілігі, буллингтің, интернет-алаяқтықтың, есірткі қылмысының және жасөспірімдер арасында жасалатын өзге де заңға қайшы әрекеттердің алдын алу сияқты өзекті мәселелер қаралады.
Алмалы ауданының прокуроры Әділет Сыздықов жастардың құқықтық санасын ояту, тәртіпті нығайту,, сонымен қатар олардың бойында патриоттық құндылықтар мен азаматтық жауапкершілікті дамыту мәселелеріне ерекше назар аударылып отырғанын айтты.
Ал Париж Олимпиадасының күміс жүлдегері Демеу Жадыраев жеке тәжірибесімен бөлісіп, жоғары нәтижелерге қол жеткізу үшін темірдей тәртіптің, қажырлы еңбектің мәні туралы баяндады.
- Бауыржан Момышұлы “тәртіпке бағынған құл болмайды” дегендей, тәртіп пен тәрбие адамның өмірінің бағыт-бағдары болуы тиіс. Үлкенді сыйлап, өзіңнен кішіге ізет көрсету керек. Кішілерге күш көрсетуге болмайды, қайта сол күшті спортқа жұмсаған дұрыс, - деді Демеу Жадыраев.