Қазақстанның Ішкі істер министрлігі интернетте тараған жүргізушілерді жеделдетілген онлайн-курстар арқылы оқыту туралы ұсыныстарға пікір білдірді, деп хабарлайды Aqshamnews.kz тілшісі Polisia.kz сайтына сілтеме жасап.
Ведомство мәліметінше, жүргізушілерді даярлау тек лицензиясы бар авто-мектептерде жүргізілуге тиіс және оқу бағдарламасы толық көлемде, оның ішінде міндетті практикалық сабақтармен өтуі қажет. Министрлік онлайн форматта көлік басқару дағдыларын меңгеру және бекіту мүмкін емес екенін атап өтті.
Сондай-ақ ІІМ авто-мектепті аяқтағаннан кейін куәлікті қағаз түрінде алу талап етілмейтінін түсіндірді: оқу курсынан өткені туралы деректер электронды ақпараттық жүйелер арқылы мамандандырылған ХҚКО-ларға автоматты түрде жолданады.
Министрлік болашақ жүргізушілерді оқуға жауапкершілікпен қарауға шақырып, білім мен практикалық дағдылардың сапасы жол қозғалысына қатысушылардың қауіпсіздігіне тікелей әсер ететінін ескертті.