Науқан аясында қала тұрғындары мен еріктілер ардагерлер мен зейнеткерлердің ауласын жинап, қариялардың алғысын алды. 30-ға жуық ерікті Наурызбай ауданы “Таусамалы” ықшамауданындағы Каменское, 34 мекенжайында тұратын Ұлы Отан соғысының ардагері Леонид Подколзиннің үйіне барды.
Наурызбай ауданындағы жалғыз соғыс ардагерінің жасы 98-те. Ардагердің күйеу баласы еріктілерге алғысын білдіріп, игі істеріне сәттілік тіледі.
“Наурызбай ауданының ерікті жастары “Алматы – біздің ортақ үйіміз” іс-шарасы аясында ардагер атамызға көмектесуге келдік. Отанымызды қорғаған батыр тұлғаға шексіз алғыс білдіреміз. Үлкен кісілердің жүзіндегі қуаныш біздің жүрегімізге де жылу беріп, ерекше күш сыйлайды”, - дейді №188 мектеп-гимназиясының 10-сынып оқушысы, ерікті Марғұлан Әмірбек.
“Алматы - біздің ортақ үйіміз” науқаны аясында аудан бойынша 200-ден астам іс-шара ұйымдастырылды. Жөндеу жұмыстарынан бастап, саябақтарды тазаладық. 8 сәуірден 8 мамырға дейін 102 мекенжайға барып, үйлердің ауласын тазалап, өзге де жұмыстарды істеуіміз керек. Бірақ 3 тұрғын көмектен бас тартты. Қалған 99 үйге көмектесеміз. Еріктілердің көбі - аудан мектептерінің оқушылары. Кейбір жағдайы нашар отбасыларға әлеуметтік көмек көрсетіледі. Тек осы науқанмен шектеліп қалмай, жазғы демалыс кезінде де көмектесеміз. Ауданымыздың ерікті жастары жақсылық жасауға құлшынып тұрады”, - деді Наурызбай ауданы әкімінің орынбасары Мирас Нұрланұлы.