Бүгін Алматы қаласында «Алматы – біздің ортақ үйіміз» атты үлкен қалалық сенбілік өтіп жатыр. Іс-шараның басты мақсаты – қаланы таза ұстау, экологияны жақсарту және ең бастысы, келешек ұрпаққа өнеге көрсету. Қазіргі таңда мегаполисте халық саны 2 миллионнан асты. Сондықтан әр адам қоршаған ортаның тазалығына үлес қосуы керек. Бұл «Алатау» дәстүрлі өнер театрының актері Оңдасын Бесікбасовтың пікірі.
«Егер тұратын жеріміз таза болса, ауамыз да таза болады. Бұл біздің немере-шөберелеріміздің денсаулығы үшін маңызды. Сондықтан мұндай сенбіліктер ай сайын ұйымдастырылып, тұрақты түрде өткізіліп тұрғаны дұрыс деп есептеймін. Тіпті, арнайы іс-шараны күтпей-ақ, әр адам күнделікті жүрген жерін таза ұстаса, қаламыз көркейе түсер еді», - дейді театр актері.