Бүгін Алматы халықаралық әуежайында ерекше қарбалас. Бүгін мұнда Оманға арнайы жіберілген рейспен елге оралған қазақстандықтарды қарсы алды, – деп хабарлайды aqshamnews.kz тілшісі Алматы қаласының Өңірлік коммуникациялар қызметіне сілтеме жасап.
Алматы – Маскат – Алматы бағыты бойынша қатынаған DV5361 рейсі Boeing 767 әуе кемесімен 314 адамды елге жеткізді. Олардың арасында баласын жетектегендер де бар. Біраз уақыттан кейін екінші рейс те келіп, тағы 230 отандасымыз елге оралады. Осылайша, Оманнан Қазақстанға 500-ден астам азамат қайтып келді. Аздап шаршағанымен, жолаушылардың жүзінде қуаныштың табы байқалады. Кейбірі тіпті жылап та жіберді. Қарсы алатындар қолына бір-бір гүл мен Қазақстанның туын ұстап алыпты. Құшақтасып, алғыс айтып, балалардың күлкісі естіліп, бәрі мәре-сәре болып қалды.
«Ұшақ Алматыға қонғанда, қатты толқыдым. Мұны сөзбен жеткізу мүмкін емес. Бізді ұмытпай, қолдау көрсеткендерге өте ризамыз», — дейді балаларымен бірге келген жолаушылардың бірі.
Келген азаматтардың айтуынша, арнаулы рейсті ұйымдастыру қиын жағдайға тап болған оларға кәдімгідей қолдау болған. Олар дипломатиялық қызмет пен көлік мекемелері жақсы жұмыс істегенін атап өтті.
Залда күтіп тұрған туыстары Қазақстан Республикасының Президенті мен Сыртқы істер министрлігіне жедел көмек көрсетіп, әр адамды назардан тыс қалдырмағаны үшін алғыс білдірді.
«Бізді ұмытпағанын сездік. Бұл сенім ұялатып, бізді тыныштандырды», — дейді елге оралған қазақстандықтардың бірі.
Олардың қауіпсіздігін қамтамасыз ету мен елге қайтару жұмысы жалғасып жатыр.
Бүгінгі Алматыдағы кездесу жай ғана жаңалықтар легіндегі оқиға емес. Бұл — мемлекеттің қай кезде болсын азаматтарына қол ұшын созып, көмектесетініне көз жеткізген күн болды.