Спортта әркім нәтижесіне жауапты екенін жақсы түсінеді, деп хабарлайды aqshamnews.kz тілшісі.
Сайлау учаскесіне алғашқылардың бірі болып қысқы Олимпиада ойындарының қатысушысы Данил Васильев келді. Спортшы таңғы сағат 07:30-да Алматы электромеханикалық колледжінде орналасқан №556 сайлау учаскесінде дауыс берді.
Алматыда туған спортшы үшін таңмен ерте тұру – үйреншікті әдет. Васильевтің айтуынша, көп жылғы спорттық тәртіп оны жаттығу мен жарыста ғана емес, күнделікті өмірде де тәртіп пен жауапкершілікке үйреткен.
– Біз, спортшылар, ерте тұрып, күн тәртібін сақтауға дағдыланғанбыз. Сондықтан таңертең ерте сайлау учаскесіне келу мен үшін қиын емес. Спортта әркім нәтижесіне жауапты екенін жақсы түсінеді. Меніңше, өмірде де шет қалмай, болашағымызға қатысты шешімдерге өзіміз атсалысуымыз маңызды. Сондықтан бүгін дауыс беруге келдім, – деді Данил Васильев.
Данил Васильев Қазақстан атынан қысқы Олимпиада ойындарына екі рет – 2022 жылы Бейжіңде және 2026 жылы қатысқан. 2023 жылы алматылық спортшы Лейк-Плэсидте өткен Дүниежүзілік қысқы Универсиадада алтын медаль иеленді.
Биыл Васильев Польшаның Висла қаласында өткен шаңғымен тұғырдан секіруден жазғы Гран-при кезеңінде де сәтті өнер көрсетті. Екі бәсекеде де үздік ондыққа еніп, төртінші және бесінші орын алған.