Америкалық әнші Дженнифер Лопес Алматыда өткен концертіндегі қызық оқиғаға пікір білдірді, - деп хабарлайды aqshamnews.kz тілшісі.
10 тамызда сахнада ән айтып тұрғанда оның мойнына шегіртке қонған еді.
Дженнифер бұл туралы The Tonight Show Starring Jimmy Fallon бағдарламасында айтты. Өнер иесі сол кезде алғашында не болғанын өзі де түсінбей қалғанын мойындады.
"Бірнәрсе сездім, бірақ шамдардың жарығынан ұшып жүрген жәндік шығар деп ойладым. Ал кейін, жоқ, денемде бірнәрсе өрмелеп бара жатқанын байқадым!" - деді әнші күліп.
Бағдарламадағы көрермендер де күлкіге қарық болды, ал Джей Ло шегірткенің қалай "қонғанын" сахнада көрсетіп берді. Ол өзін ұстап, сабыр сақтауға тырысқанын да айтты.
"Ол мені қыдықтап жатты. Іштей: "Жарайды, әнді бітіріп алайын", - деп ойладым. Ал сілкіп жібергеннен кейін жарықта не екен деп қарасам, тікұшақтай үлкен шегіртке екен!" - деп әзілдеді Лопес.
Бұл оқиға желіде мемге айналды. Қолданушылар "дүниедегі ең бақытты шегіртке", "оны 500 долларға аукционға қою керек" деп қалжыңдады. Ал кейбіреулер Лопестің кәсібилігіне таңданысын білдірді.
"Мен оның орнында болсам, айқайлап сахнадан қашып кетер едім. Ал ол әнін тоқтатпады!" - деп жазды желі қолданушылары.
Дженнифер мұндай тосын жағдайлар концертте жиі болатынын айтты.
"Сахнада не боларын білмейсің. Бірақ ең бастысы - бәрін аяғына дейін жеткізіп, көрерменге шоу сыйлау", - деді ол.
Айта кетейік, 10 тамызда Алматының Орталық стадионында Дженнифер Лопестің Қазақстан тарихындағы алғашқы концерті өтті.