Ақмола облыстық соты Макинск қаласының 21 жастағы тұрғынын жолда қауіпті дрифт жасағаны үшін әкімшілік жауапкершілікке тартты, деп хабарлайды Aqshamnews.kz тілшісі.
Сот анықтағандай, оқиға қаланың орталығында, көктайғақ кезінде болған. Жас жүргізуші көлігін жоғары жылдамдықпен айналдырып, «сегіздік» салып, қарсы жолаққа шығып, өзге жүргізушілердің өміріне қауіп төндірген.
Куәгерлердің айтуынша, басқа көлік иелері жағдайдың қауіпті екенін ескерту үшін дыбыстық белгі беруге мәжбүр болған. Жол ережесін бұзған азаматтың әрекеттері бейнежазбалар арқылы дәлелденген.
Сотта ол кінәсін толық мойындап, өз іс-әрекетінің жауапсыз болғанын мойындады. Сот оның көлік тізгіндеу кезінде қауіп-қатерге жеңіл қарағанын және әдейі апатты жағдай туғызғанын ескерді.
Нәтижесінде, құқықбұзушыға 5 тәулік әкімшілік қамау жазасы тағайындалды. Сот шешімі әлі заңды күшіне енген жоқ.