Шымкенттік 21 жастағы Нұрай Серікбайдың отбасы қылмыс бойынша тергеуді Ішкі істер министрлігінің Тергеу департаментіне беруді талап етіп отыр, деп хабарлайды Aqshamnews.kz тілшісі.
Жәбірленуші тараптың адвокаты Аянхан Омаровтың айтуынша, марқұмның туыстары Шымкент қалалық полиция департаментінің қызметкерлеріне сенімсіздік білдіріп, қылмыстық істі ІІМ деңгейінде тергеуді сұраған. Осыған байланысты отбасы Президент Әкімшілігіне, Бас прокуратураға және Ішкі істер министрлігіне ресми шағым жолдаған. Адвокат тергеуге сенімсіздік себептерін жарияламады, оны тергеу құпиясымен байланыстырды.
Нұрайдың өлімі туралы не белгілі?
Қайғылы оқиға 11 қаңтарда болған. Әлеуметтік желілерде тараған бейнежазбаларда ер адамның қызды қуып жетіп, пышақтап, оқиға орнынан қашып кеткені көрінеді. 13 қаңтарда күдікті 28 жастағы жергілікті тұрғын қала сыртында ұсталды.
Оған ҚР Қылмыстық кодексінің үш бабы бойынша іс қозғалды:
-
99-бап, 1-бөлік — «Адам өлтіру»;
-
125-1-бап — «Неке қиюға мәжбүрлеу»;
-
115-1-бап — «Сталкинг».
Марқұмның туыстарының айтуынша, қылмысқа дейін бірнеше ай бойы қудалау болған, сондай-ақ алып қашу әрекеті тіркелген. Отбасы полицияға бірнеше рет жүгінгенімен, олардың арызы қабылданбаған.
Бұл іске Қасым-Жомарт Тоқаев та назар аударып, Ұлттық құрылтайда полиция жұмысына баға беруді тапсырды. Осыдан кейін Шымкент қаласы полиция департаментінің басшысы қызметінен босатылып, мәжбүрлеп некеге қатысты арызды тіркемеген қызметкерлерге қатысты салғырттық дерегі бойынша қылмыстық іс қозғалды.
Кейін әлеуметтік желіде марқұмның бұрын түсірілген видеосы тарады. Онда Нұрай Серікбай өзін мәжбүрлеп алып кету болмағанын айтып, күдіктіге шағымы жоқ екенін жеткізеді. Алайда отбасының адвокаты бұл видео тергеу құпиясын бұзу деп бағаланып, осы дерек бойынша да ресми шағым түсірілгенін мәлімдеді.