Таяуда ғана үшінші рет отбасын құрған танымал актер Дәурен Айдарқұлов алғаш рет жұбайы туралы ашық айтты, деп хабарлайды Aqshamnews.kz тілшісі. Бұл туралы ол журналист Аман Тасығанға берген сұхбатында әңгімеледі.
Белгілі актер Дәурен Айдарқұлов өзінен бірнеше жас кіші үшінші әйелі Жұлдызбен қалай танысқанын айтты. Айтуынша, болашақ жұбайын әлеуметтік желіден көріп, сол арқылы байланыс орнатқан.
"Есімі - Жұлдыз. Тредс желісінен таптым. Әртүрлі жерден жарымды іздеп жүрдім. Біреулер таныстырып жатады, бірақ ешкім көңілден шықпайтын. Кейін желіден Жұлдызды байқап қалып, сөйлесе бастадық. Екі аптадан кейін туған ағасының алдынан өттім. Тойды жоспарладық. Шілдеде таныссақ та, жұбайымды қыркүйекте сол неке қиятын күні алғаш ретін өмірде көрдім", - деді актер.
Сондай-ақ, актер қазіргі әйелінің өзінен 15 жас кіші екенін айтты.
"Жұлдыз екеуміздің арамыз 15 жас. 1997 жылы туған. Үйде онлайн жұмыс істейді. Түрлі жалған ақпараттар тарап жатыр ғой. Бірақ шындықты осында айтайын", - дейді Айдарқұлов.
Еске салайық, Дәурен Айдарқұлов жақында үшінші рет шаңырақ көтергенін жариялаған еді. Оның жаңа некесі желі қолданушылары арасында үлкен талқылауға түсті. Актер бұған дейін екі рет үйленіп ажырасқан. Ол екінші рет некесін танымал актриса Ақбота-Нұрмен қиған еді.
