Алматы қаласының Әуезов ауданында "Наурызнама" мерекелік апталығы аясында Ұлттық спорт түрлеріне арналған күн ұйымдастырылды. Бұл шараға "Шыңға өрлеу" әлеуметтік клубының тәрбиеленушілері қатысып, арқан тарту, асық ату, тоғызқұмалақ, тымақ ұру, армрестлинг сияқты дәстүрлі ойындарда өзара бақ сынады, деп хабарлайды Aqshamnews.kz
"Шыңға өрлеу" қоғамдық қорының директоры Булат Әбішевтің айтуынша, бұл шара балалардың ойлау қабілетін, жылдамдығы мен ептілігін дамытып қана қоймай, оларды ұлттық құндылықтарды құрметтеуге, үлкендерді сыйлауға, патриоттық сезімді қалыптастыруға баулиды.
Көктемнің шуақты күні сайыскерлерге көтеріңкі көңіл-күй сыйлады. Жарыстың белсенді қатысушысы Әлинұр Қайдаров арқан тарту сайысында жеңімпаз атанды.
"Бүгін ұлттық ойындарды ойнау үшін келдік. Маған әсіресе асық ату қатты ұнайды. Ал арқан тарту сайысында жеңімпаз болғаныма ерекше қуаныштымын. "Шыңға өрлеу" клубы маған тегін білім алып, түрлі үйірмелерге қатысуға мүмкіндік береді. Баршаңызды Наурыз мерекесімен құттықтаймын!" – деді жас жеңімпаз.