Наурызбай ауданы тұрғындарымен кездесу барысында жергілікті халық Алматы әкіміне маңызды мәселені – Таусамалы шағын ауданындағы көше жарығы орнатуды шешкені үшін алғыс айтты, деп хабарлайды aqshamnews.kz
Тұрғындардың бірі екі жыл бұрын осындай кездесуге қатысып, көше жарығы мәселесін көтергенін айтты.
«Сол кезде сіз бұл мәселені қарастырамыз деп уәде бердіңіз. Бүгін көшеміздің тұрғындарының өтініші бойынша сізге алғыс айтуға келдім. Сұранысымызды назардан тыс қалдырмай, жұмысты орындағандарыңыз үшін рахмет. Қазір көшелер жарық, жүру қауіпсіз. Сізге және әкімдікке еңбектеріңіз үшін алғысымызды білдіреміз, мүмкіндігінше барлық мәселеміз шешіліп жатыр», – деді тұрғын.
Өз кезегінде шаһар басшысы Наурызбай ауданының қажеттілігіне ерекше назар аудару маңызды екенін атап өтті.
«Наурызбай ауданын ерекше жақсы көремін, өйткені бұл қаланың ең жас ауданы, сондықтан біз оған ерекше көңіл бөлуіміз керек. Тұрғындар біздің жұмысымыздың сапасына риза болатын осындай кішігірім жеңістер көбейе берсін», – деді Ерболат Досаев.
Әкімнің айтуынша, биыл ауданның толық жарықтандырылуын қамтамасыз ету үшін, оның ішінде бұрынғы саяжай алаптарындағы көшелерге жарық жүргізу үшін бюджеттен қосымша 1,3 млрд теңге бөлінеді.