Алматыда «Таза Қазақстан» республикалық бағдарламасы аясында өтіп жатқан ауқымды «Алматы – біздің ортақ үйіміз» атты қалалық науқан жалғасуда. 1 наурызда басталған бұл бастамаға күн сайын қарапайым тұрғындардан бастап, Олимпиада қаһармандарына дейін көптеген адам қосылып жатыр.
Мысалы, Алматының Әуезов ауданында ерекше жүгіру жарысы өтті. Қатысушылар өздерінің физикалық дайындығын көрсетіп қана қоймай, қоршаған ортаны қорғауға да белсенді атсалысып, қоқыс жинау жылдамдығы бойынша жарысты. Жарысқа 2024 жылғы Париж Олимпиадасының күміс жүлдегері Нариман Құрбанов та қосылды.
«Мен спортшы ретінде, олимпиада жүлдегері ретінде барлық алматылықты жыл сайынғы «Алматы – біздің ортақ үйіміз» науқанына атсалысуға шақырамын. Алматыда туып-өскен адам ретінде қаламыздың тазалығы – қолымызда екенін жақсы түсінемін. Әрбір азамат тек үйінің емес, қаланың да тазалығына үлес қосуы керек деп ойлаймын. Сонда ғана біз көшеде еркін жүріп, қаламыздың сұлулығына сүйсіне аламыз», – деді спортшы.
Айта кетейік, тығыз кестесіне қарамастан, танымал спортшы сүйікті қаласының игілігі үшін экологиялық акцияларға үнемі уақыт табады.
«Біз әрдайым барынша шығуға, үйіміздің, мектебіміздің маңын тазартуға тырысамыз. Бүкіл командамызбен осындай акцияларға белсенді қатысамыз», – деді Нариман Құрбанов.