Сауд Арабиясы, Австралия, Қытай және Дубайдан келген қонақтар бар, деп хабарлайды aqshamnews.kz тілшісі.
Алматының Орталық стадионында өтіп жатқан америкалық рэпер Канье Уэсттің (YE) ауқымды концертіне әлемнің түкпір-түкпірінен жанкүйерлер жиналды. Көптен күткен перформансты тамашалау үшін көрермендер тек алыс шетелден ғана емес, ең шалғай өңірлерден де арнайы келген. Солардың бірі – Якутскіден ұшып келген Милена.
Миленаның айтуынша, Алматыға дейінгі жол ұзақ болғанымен, сүйікті әртісінің өнерін көру үшін бұл қашықтықты еңсеруге дайын болған. Оның сөзінше, сапардан алған әсері мен Алматының атмосферасы барлық күткенінен асып түскен.
«Мен Алматыға Якутскіден Канье Уэсттің концертіне арнайы ұшып келдім! Әдетте концерттерге көп бара бермеймін, бірақ бұл – ерекше жағдай. Сондықтан мұндай мүмкіндікті жіберіп алғым келмеді. Жолға біраз уақыт кетті, бірақ осындай маңызды шара үшін оған әбден тұрарлық. Қала керемет, мұнда ерекше атмосфера бар. Бәріміз концерттің басталуын асыға күтіп отырмыз», – деді Милена.
Якутскіден келген жанкүйердің оқиғасы бұл кешке жиналған көрермендердің географиясы қаншалықты кең екенін көрсетеді. Сауд Арабиясы, Австралия, Қытай және Дубайдан келген қонақтармен қатар, әлемнің түрлі қалалары мен елдерінен келген жанкүйерлер Алматыны музыкалық өнер сүйер қауымның халықаралық орталығына айналдырды.