Эстрада әншісі Мирас Жүгінісов кейінгі күндері қоғамда үлкен талқыға түскен ағасы Рүстем Жүгінісовтің мәлімдемесіне қатысты өз ойын білдіріп, жұртшылықтан кешірім сұрады. Ол бұл туралы Threads әлеуметтік желісіндегі парақшасында жазды, - деп хабарлайды Аqshamnews.kz.
Бұған дейін не болды?
Ақтөбедегі мешітте мұсылманша киінген ер адам намаз оқуға барған қызға интимдік қарым-қатынас үшін "бір реттік неке" ұсынған болатын. Оқиғаға Мирастың ағасы Рүстем Жүгінісов пікір білдіріп, қыздың өзін кінәлаған еді. Оның пікірі желіде үлкен резонанс тудырып, жұрт Жүгінісовтер отбасына хейт жаудырды.
"Барша жаннан кешірім сұраймын!"
Ағасының айтқаны үшін Мирас та айыпталып, көпшілік оның жақында болатын концертіне бармайтындарын жарыс жазды. Жағдайды бей-жай қалдырмай Мирас Жүгінісов Тhreads-тегі парақшасында жазба жариялады. Оның айтуынша, әрбір адамның өз пікірі бар, алайда бұл тұста отбасы мүшелерінің көзқарастары бірдей бола бермейді.
"Соңғы уақытта ағамның айтқан сөздері қоғамда үлкен резонанс тудырып, кейбір азаматтардың көңіліне қаяу түсірді. Ол – өз ойын айтқан жеке тұлға. Ал мен өз жолыммен жүрген, жеке ұстанымы бар адаммын. Отбасыма деген құрметім зор, бірақ туыстарымның пікірі менімен әрдайым сәйкес келе бермейді. Осы себептен кейде келіспеушіліктер туындайтыны да рас", – деп жазды әнші.
Сонымен қатар, Мирас Жүгінісов бұл жағдайдан кейін ренжіген жандардан кешірім сұрады. Ол өзінің шығармашылығында әйел адамдарға деген құрметті бірінші орынға қоятынын атап өтті.
Айта кетейік, қыркүйекте Алматы қаласындағы Орталық стадионда Мирас Жүгінісовтың жеке концерті өтеді деп жоспарланып отыр.