Мереке күндері жұмыс істеу адамның денсаулығына кері әсер етуі мүмкін.
Бұл туралы Ресей Денсаулық сақтау министрлігіне қарасты В.П. Сербский атындағы Ұлттық психиатрия және наркология ғылыми-зерттеу орталығының маманы Иван Розанов мәлімдеді, деп хабарлайды aqshamnews.kz.
Маманның айтуынша, мерекелер — адамның тынығуына, эмоциялық қалпын қалпына келтіруіне және жақындарымен қарым-қатынасын нығайтуға мүмкіндік беретін маңызды кезең. Ал бұл күндері жұмыс істеу адам ағзасының бейімделу мүмкіндіктерін әлсіретіп, күйзеліске қарсы тұру қабілетін төмендетеді.
Розанов мерекенің тіпті соғыс кезінде де атап өтілетінін еске салып, қазіргі қоғамда бұл күндер гаджеттерден алыстап, ұйқыны қалпына келтіріп, сүйікті іспен айналысуға мүмкіндік беретінін атап өтті. Мұндай әрекеттер жүйке жүйесін тынықтырып, адамның жалпы психикалық жағдайын жақсартады.
Ғалымдар адамның өмірінде бірсарындылықтың (монотондықтың) жиі кездесетінін, ал ол өз кезегінде ұзақ мерзімді күйзеліске алып келуі мүмкін екенін айтады. Мереке күндері — осы бірсарындылықты бұзып, адамның өмірге деген қызығушылығын арттырудың бір жолы.
Сондай-ақ мереке кезіндегі қуаныш пен жағымды эмоциялар ағзада серотонин мен дофамин сияқты «бақыт гормондарының» бөлінуіне ықпал етіп, мотивация мен өмірлік белсенділікті арттырады. Табиғат аясында, жақындармен бірге өткізілген уақыт ми қызметін жақсартып, зейінділікті күшейтеді.