Қазақстанның еңбек сіңірген қайраткері Нұрлан Сегізбаев дүниеден өтті. Ол Абдолла Қарсақбаевтың әйгілі «Менің атым Қожа» көркем фильміндегі басты рөлі арқылы көрерменге кеңінен танылды. Қазақстан Республикасы Мәдениет және ақпарат министрлігі марқұмның отбасы мен жақындарына, сондай-ақ Қазақстан халқына көңіл айтты.
«Нұрлан Санжарұлы – қазақ мәдениеті мен өнерінің дамуына елеулі үлес қосқан тұлға. Ол өз ғұмырын шығармашылыққа, ұлттық руханиятқа арнап, кейінгі ұрпаққа өнеге болатын мол мұра қалдырды. Өнерсүйер жұртшылыққа әлі күнге құндылығын жоймай келе жатқан Абдолла Қарсақбаевтың «Менің атым Қожа» фильміндегі басты рөлімен танымал өнер иесі қазақ кино өнеріндегі дара тұлға болды. Оның экранда жасаған көркем бейнелері отандық өнер тарихында айрықша орын алады. Нұрлан Санжарұлының жарқын бейнесі, шығармашылық мұрасы мен ғибратты ғұмыр жолы халқымыздың жадында мәңгі сақталады деп сенеміз. Марқұмның жаны жәннатта, иманы саламат, топырағы торқа болғай», - делінген хабарламада.
Соңғы жылдары Нұрлан Санжарұлы ауыр дертпен күрескен. Дәрігерлер оған өкпенің созылмалы обструктивті ауруының (ХОБЛ) 4-дәрежесі диагнозын қойған.
Қазақстанның еңбек сіңірген қайраткері, актер, киногер Нұрлан Санжардың жаназанасы мен қоштасу 28-желтоқсан (жексенбі) Жазушылар одағының ғимаратында сағ. 10-да өтеді.