Жетісу облысында полицейлер егде жастағы тұрғынды алаяқтардың арбауынан дер кезінде құтқарып қалды, деп хабарлайды Аqshamnews.kz тілшісі Polisia.kz-ке сілтеме жасап.
Оқиға облыстағы сауда орталықтарының бірінде болған. Полиция қызметкерлері телефонмен абыржып сөйлесіп тұрған зейнеткер әйелдің мінез-құлқына күмәнданып, жанына жақындаған. Тексеру барысында белгісіз біреулер оған қоңырау шалып, "тексеру жүргіземіз" деген сылтаумен SMS арқылы келген кодтарды айтуды талап еткені анықталды.
Алаяқтар әйелдің атына 5 миллион теңге несие рәсімдеуге әрекеттенген. Алайда банк тек 2 миллион теңгені мақұлдаған. Сол ақшаны зейнеткер алаяқтарға аудармақ болған сәтте полицейлер араласып, жағдайды тоқтатқан.
Тәртіп сақшылары қоңырау шалып тұрған адаммен байланысқа шыққанда, ол өзін Әсел деп таныстырып, әйелдің қызы екенін айтқанымен, анасының аты-жөні мен тегін дәл атай алмаған. Бұл алаяқтық әрекеттің барын айқындай түскен.
Полицияның қырағылығының арқасында 2 миллион теңге көлеміндегі шығынның алдын алды. Зейнеткерге түсіндіру жұмыстары жүргізіліп, алаяқтардың кең тараған тәсілдері айтылған.
Полиция азаматтарды сақ болуға шақырып, банк немесе мемлекеттік орган қызметкерлері телефон арқылы SMS-код сұрамайтынын және ақша аударуды талап етпейтінін ескертеді.
