Мемлекеттік қызметшілер – қоғам өмірінде маңызды рөл атқаратын тұлғалар. Олардың қызметтік тәртібі мен әдебіне жоғары талаптар қойылады.
Қазақстанда мемлекеттік қызметшілердің қызметтік этикасы Қазақстан Республикасы Президентінің 2015 жылғы 29 желтоқсандағы №153 Жарлығымен бекітілген Мемлекеттік қызметшілердің Әдеп кодексімен реттеледі. Бұл құжат қоғамның мемлекеттік органдарға деген сенімін нығайтуға, мемлекеттік қызметте жоғары мәдениет пен парасаттылық атмосферасын қалыптастыруға, сондай-ақ әдепсіз мінез-құлықтың алдын алуға бағытталған. Кодексте белгіленген әдеп стандарттары барлық мемлекеттік қызметшілер үшін міндетті болып табылады.
Мемлекеттік қызметшілердің әдеп қағидаттары:
🔹 Адал ниеттілік – қоғам игілігі үшін мемлекетке кәсіби әрі жауапты қызмет ету.
🔹 Адалдық – өз міндеттеріне шынайы көзқараспен қарау.
🔹 Әділдік – заң талаптарын бұлжытпай орындап, шешім қабылдау кезінде объективті болу.
🔹 Ашықтық – халықпен кері байланыс орнатып, қызметінің ашықтығын қамтамасыз ету.
🔹 Сыпайылық – азаматтар мен әріптестерге құрметпен қарау.
🔹 Клиентке бағдарлану – мемлекеттік қызмет көрсетудің сапасын арттырып, бюрократия мен артық әуре-сарсаңға жол бермеу.
Сонымен қатар, мемлекеттік қызметші кәсіби білім мен іскерлік қасиеттерді меңгерумен қатар, қарапайым, әдепті, әділ болуы, қызметтік жағдайын жеке мүддесіне пайдаланбауы және азаматтардың құқықтарына нұқсан келтіретін әрекеттерге қарсы тұруы тиіс. Сондай-ақ, ол қызметтен тыс уақытта да моральдық-әдептік нормаларды сақтап, әріптестерімен іскерлік қарым-қатынас орнатуы қажет.
Әрбір мемлекеттік қызметші өз міндетін адал орындап, заңдылықты сақтауға және қоғамның дамуына үлес қосса, халықтың билікке деген сенімі артып, мемлекеттік қызметтің беделі жоғарылайтыны сөзсіз.