Алматының Медеу ауданында Қалдаяқов көшесі, 93/95 мекенжайындағы аулада абаттандыру жұмысы аяқталды. Енді бұл тұрғындарға серуендеп, ойнап және отбасымен демалуға қолайлы заманауи аумақ. Биыл бұл бағдарлама аясында Медеу ауданында барлығы 46 аула жаңартылды.
Жұмыс "Халық қатысатын бюджет" жобасы аясында жүзеге асты. Бұл бастама қала тұрғындарына аудандарындағы абаттандырудың басым бағыттарын өздері айқындауға мүмкіндік береді.
Жаңарған аулада автоматты суару жүйесі орнатылып, берік резеңке жабын мен жаңа көгал төселді, тас төсеуіштер ауыстырылды. Ескі нысандардың орнына балаларға арналған кешен, әткеншек, воркаут және көше тренажерлары сынды заманауи ойын және спорт алаңдары салынды. Футбол алаңының қоршауы жаңартылып, жарық шамдары мен тіректер орнатылды, ағаштың бұтақтары санитарлық мақсатта кесілді. Сонымен қатар демалуға арналған күрке мен әткеншектер де жөнделіп, жаңарды.
Тұрғындардың айтуынша, аула аудан тұрғындарының сүйікті орнына айналған.
"Біздің аула танымастай өзгерді. Барлығы заманауи әрі әдемі. Балалар таңнан кешке дейін алаңда ойнайды, ересектер демалуға арналған күрке маңында жиналады, кешке жарық әрі жайлы серуендеуге болады", – дейді қала тұрғыны Анджела Чекмарева.
Медеу ауданының әкімдігі аулаларды көріктендіру жұмыстары жалғасатынын айтады.
