Алматының Медеу ауданында көгалдандыру мен жасыл желекті дамыту жұмысы жалғасып жатыр, – деп хабарлайды aqshamnews.kz тілшісі.
Бұл туралы аудан әкімі Еркебұлан Оразалин Өңірлік коммуникациялар қызметінде өткен брифингте хабарлады.
Ауданның жалпы жасыл қоры 1,1 мың гектар болады. Жыл сайын аудан ағаш, бұта мен гүлдерді үзбей егіп отырады. Биыл да 60 мыңнан астам бұта, 48 мыңнан астам гүл мен 1 мыңнан астам ағаш егуді жоспарлап қойыпты.
Суару мәселесіне ерекше көңіл бөлінген. Өткен жылы жаз мезгілінде, оның ішінде Шығыс айналма автожолының бойында құрғақшылық болып, бұл жасыл желектің күтіміне едәуір әсер етті. Осыған байланысты суару жүйесін жаңғырту жобасы әзірленген болатын.
Қазіргі уақытта Шығыс айналма автожолы бойында автоматты суару жүйесіне күрделі жөндеу жүргізіле бастады. Жоба аясында 16 гектар аумақ қамтылып, 98 шақырым желі жаңартылып, 2 резервуар орнатылады. Жұмысты осы жылдың тамызына қарай аяқтау жоспарланған.
Сонымен қатар, биыл ауданда «Халық қатысатын бюджет» бағдарламасы аясында 31 жоба жүзеге асырыла бастады, оның 13-і автосуару жүйесін орнатуға бағытталған.
Медеу ауданы әкімінің айтуынша, бұған дейін автосуару бойынша мұндай көлемдегі жұмыс қолға алынбапты. Бұл климаттың өзгеруімен, жаз мезгіліндегі температураның жоғарылауымен байланысты.
«Жүргізіліп жатқан жұмыс жасыл желектерді сақтап, ауданды өмір сүруге қолайлы етуге мүмкіндік береді», – деп түйіндеді Еркебұлан Оразалин.